Regionrådet for Nordhordland og Gulen har valt å kommentere dei ulike programområda
i planen.
I tilknytting til programområde 4.1 "Bruk og vern av areal,
miljø- og naturressursar" vil Regionrådet vise til utkast til
fylkespolitiske retningsliner under punkt 7: Hordaland skal ha ei
økonomisk utnytting av olje og naturgass som ikkje fører til auka
forureinande utslepp.
Det er rådet si meining at formuleringa vil vere vanskeleg å leve med
for Hordaland sitt vedkomande. Ein bør ikkje innføre denne typen
geografiske avgrensingar av den nasjonale miljøpolitikken. Regionrådet kan
tenkja seg ei slik alternativ formulering: Hordaland skal ha ei
økonomisk utnytting av olje og naturgass på kontinentalsokkelen.
Når det gjeld programområde 4.2 "Senterutvikling" vil
Rådet særskilt vise til "region" og "regionsenter"
omgrepa.
Regionrådet vil be om at Knarvik vert teke med i dette programområde
under omgrepet regionsenter på lik line med Stord, Voss og Odda.
I framlegget til planen har ein valt å definere regionar einsidig ut i
frå eit pendlingsomgrep utarbeidd av Statistisk sentralbyrå.
Ein får då fram desse "regionane" i Hordaland:
Bergensregionen, Stord pendlingsregion, Odda pendlingsregion, Voss
pendlingsregion og ei fylkesoverskridande region; Haugesund pendlingsregion.
Etter Regionrådet si meining må det vere rett å kunne nytte nemninga
regionsenter sjølv om dette senteret ligg innafor dominansen av eit anna og
større senter.
I tillegg bør regionomgrepet ikkje berre knytast til ein variabel
(pendling) men fange opp andre tilhøve som; regionale handle- og
trafikkmønstre, lokalisering av interkommunale, fylkeskommunale og statlege
institusjonar og ikkje minst vere basert på lokal identitet og samkjensle.
I så måte bør Nordhordland definerast som ein region i fylkesplanen og
Knarvik definerast som eit regionsenter.
Det heiter i dei "fylkespolitiske retningslinene" som er trekt
opp i planen for regionsentra at dei m.a. skal vere: "Lokaliseringsstad
for regionale offentlege og private tenester, spesialiserte funksjonar retta
mot innbyggjarane i heile regionen. Regionale transportknutepunkt og høg
kollektivdekning".
I Nordhordland har vi i lang tid arbeidd med å styrkje og utvida dei
regionale tenestetilboda som vert forvalta av fylkeskommunen eller staten.
Regionrådet har i så måte sett det som særs positivt at det er komme
fleire nye tilbod lokalisert til vårt distriktet dei seinare åra.
Rådet meiner at dette, i stor grad, har sin bakgrunn i at Nordhordland
vert oppfatta som ein region og Knarvik som eit regionsenter.
Regionrådet har også nokre merknader til programområde 4.3
"Utbyggingsmønsteret i Bergensregionen" og meir
generelt til omtale og framlegg i planen om arealdisponeringa i fylket.
Det er rådet si meining at ein i fylkesplanen ikkje må låse seg til
avgrensa definisjonar som kan føre til stengsel for ein naturlege
arealbruk.
Også dei såkalla vekstkommunane i Bergensområdet har sine utkantar og
det vil vere urett om ein ikkje skal ha høve til å gjennomføre ei meir
sprett utbygging i desse områda. Såleis er det naturleg at det er ulikskap
i arealbruken i randområda i høve til i dei sentrumsnære områda.
Om programområde 4.4 "Hordaland som eitt transportfylke".
Som i Regionrådet sin høyringsuttale til Nasjonal transportplan har ein
også i denne uttalen valt å vektleggje nokre tilhøve i samband med
utviklinga innafor vegsektoren.
Regionrådet har registrert at dei tilrådde statlege løyvingane til
riksvegutbygging i dei næraste åra er dei lågaste som har vore på mange
tiår og ber om at fylkeskommunen arbeider for at rammene vert auka monaleg.
Regionrådet ber og om støtte til at fleire vegprosjekt kan
delfinansierast med hjelp av bompengar.
Det gjenstår utbetring/nybygging av fleire ulike parsellar i
Nordhordland før vi får ein rimeleg tilfredsstillande standard på vegane
i regionen.
Regionrådet er glad for at ein i planframlegget til Nasjonal
transportplan rår til ei utbetringa av Ev 39 gjennom Romarheimsdalen i
perioden 2002 - 2005. Når det elles gjeld Ev 39 så er det Regionrådet si
meining at ein og snarast må gjennomføre tiltak for å betre
trafikktilhøva gjennom tettstaden Knarvik.
Ringvegen i Nordhordland utgjer ein stor og viktig del av det sekundære
riksvegnettet i regionen. Denne vegen har fleire stader særs dårleg
standard, særskilt gjeld dette deler av 565 over Radøy. I tillegg har
vegstrekningar i Austrheim kommune og parsellen Seim - Herland i Lindås
kommune langt frå fullgod tofelt standard.
Også på deler av riksvegen nord for Frekhaug i Meland kommune er det
trong for utbetringar.
Det er viktig at desse vegane vert utbygde snarast slik at ein kan få
styrkja grunnlaget for dei lokale sentra i regionen og såleis medverke til
å halde oppe busettings-mønsteret og dempe sentraliseringstendensane.
Det må og setjast av midlar til trafikksikringstiltak i regionen slik at
ein får verna dei mjuke trafikantane og bygd ut tilstrekkeleg med veglys og
busslommer.
Når det gjeld ferjetrafikken i regionen så vil Regionrådet vise til at
desse sambanda er ein del av riksvegnettet og meiner at desse på sikt bør
verte gratis for trafikantane.
Om sjøtransport og regionalt oljevern.
Regionrådet vil peike på det arbeidet som ved fleire høve har vore
gjort lokalt for å få bygd ut beredskapen i Nordhordland.
Rådet viser til at omlag halvparten av all godstonnasje til/frå landet
vårt går over eit område avgrensa mellom Bergen og Solund. I tillegg har
dette området ein stor trafikk som går nord-sør langs kysten.
Dei fleste større oljeulykker i kystområda i Noreg har skjedd på
Vestlandet.
I tillegg medfører oljeaktiviteten i Nordsjøen ein monaleg
ulykkesrisiko.
Eit større oljeutslepp kan føre til ein katastrofe for fisket,
oppdrettsnæringa og reiselivsnæringa - næringar som er særs viktige for
Kyst-Norge.
Regionrådet meiner difor det bør byggjast opp ein større oljevernbase
i Fedje-Fensfjordbassenget.
Om programområde 4.5 "Kunnskapsfylket Hordaland".
Regionrådet ser det som positivt at ein i fylkesplanen fokuserer på
koplinga mellom næringsutvikling og kunnskap/kompetanse.
Regionrådet er generelt oppteken av å få til eit godt samarbeid mellom
næringsliv og kompetansemiljø både på høgskolenivå, innafor dei
vidaregåande skulane og innafor etter- og vidareutdanninga. Per dato
gjennomfører ein i regional regi fleire prosjekt knyta til desse
problemstillingane.
Når det gjeld dei vidaregåande skulane særskilt vil Regionrådet peike
på to tilhøve.
Det eine er at studieretningar som Naturbruk (blå variant), Musikk dans
og drama og Idrettsfag må verte vurdert innført ved skular i regionen, og
det andre at dei fysiske fasilitetane på skulane må verte utbygd slik at
dei stettar dagens krav til skulemiljø og arbeidsmiljø.
