Uttale til Strategisk transportanalyse for Hordaland - Nasjonal transportplan 2006 -2015.

Regionrådet har merka seg at den strategiske transportanalysen for Hordaland har som mål å bidra til auka verdiskaping og styrking av robuste arbeids- og bustadmarknader i fylket gjennom å skape grunnlag for å vidareutvikle transporttilboda og dei regionale transportknutepunkta. Ei anna formuleringar som er nytta i rapporten er at ei vidare utbygging av samferdsletilboda skal bidra til utvikling av "område med næringspotensiale".

Til dette vil Regionrådet peike på at heile Nordhordland og Gulen ligg innafor område som har store potensiale i høve til vidare næringsutvikling.

Regionen har ei aktiv marin næring med ei rad matfiskkonsesjonar og med integrert produksjon, frå smolt til vidareforedling. I tillegg vert det satsa mykje på oppdrett av nye marine arter både i sjø og på landbaserte anlegg med utgangspunkt i varmtvatn på Mongstad.

Regionen har store hamneanlegg i Fensfjordområdet, på Mongstad og i Sløvåg, og grunnlag for vidare utbyggingar knyta til maritim sektor.

På Mongstad ligg landets største oljerelaterte prosessanlegg med oljeraffineri og anlegg for fraksjonering av våtgass, samt ein større råoljeterminal. Her er det grunnlag for nye utbyggingar basert på vidare foredling av våtgass og mogeleg tilrettelegging for bruk av naturgass og utbygging av energiverk.

I tillegg har området ein større forsyningsbase på Mongstad Sør som forsyner Hydro sine petroleumsfelt i Nordsjøen.

Regionrådet vil peike på at Nordhordland kan by på mange attraktive buområde.

Søndre deler av regionen, som også er særskilt interessant for "bustadflyttande" bergensarar, er integrert i eit felles arbeids-/buområde med resten av Bergensregionen. Men jo lengre nord ein kjem i Nordhordland jo meir byrdefull vert ein evt. pendling til Bergen.

Regionrådet er såleis ikkje minst oppteke av å få utvikla arbeidsplasstilboda i dei nordre delane av regionen.

I den strategiske næringsplanen for Nordhordland og Gulen heiter det i målsettinga m.a. at "alle kommunane i regionen skal ha ei positiv folketals-utvikling".

Reint næringsmessig, med utgangspunkt i det som er nemnt ovanfor, er det grunnlag for å ha ein slik ambisjon med omsyn til folketalsutviklinga. Ein føresetnad er likevel at vi regionalt lukkast med å utvikle gode kommunikasjonar.

I denne samanheng vil Regionrådet understreke at transportkostnadene for bedriftene må reduserast og at kollektivtilboda må betrast.

Regionrådet vil peike på at utbetringane på stamvegen i Romarheimsdalen, som er ført opp i planperioden 2002 - 2005 med i alt 210 mill. kr., må gjennomførast som planlagt!

Regionrådet vil elles peike på at trafikkproblema knyta til E-39 gjennom Knarvik senter i første omgang må løysast ved at det vert bygd to rundkøyringar. På sikt må stamvegen førast i tunnel under senteret.

Rådet vil og streke under at det er viktig for sambandet sørover til Bergen at tunnelen Vågsbotn - Haukås vert bygd som planlagt med anleggsoppstart i år! Parallelt må det arbeidast med å få fasa inn tunnelen mellom Nyborg - Klauaneset slik at vi unngår å komme opp i dei trafikkproblem som ein i dag har på fleire vegstrekningar i Bergen Sør.

Ei utbetring av det sekundære vegnett er særs viktig for at verksemdene i Nordhordland og Gulen skal få til ein kostnadseffektiv logistikk. Dei fleste vareproduserande verksemdene i regionen ligg lokalisert til dels langt borte frå stamvegane. I denne samanheng er det viktig å få bygd ut ein fullgod standard på heile "ringvegen" i Nordhordland.

Regionrådet vil understreke at arbeidet med å utbetre vegstrekninga Isdal - Herland må startast opp, slik det er tilrådd, i inneverande planperiode.

Strekninga Tolleshaug - Soltveit - med arm til Manger, er kalkulert til 175. mill. kr. I NTP 2002 -2011 er det ført opp 50 mill. kr. til dette anlegget i perioden 2006 -2011. Regionrådet vil peike på at dei statlege løyvingane til strekninga må aukast monaleg.

Det må og løyvast pengar til parsellar på ringvegen i Austrheim, til strekninga Mjåtveit - Dalstø i Meland og til utbetring/trafikksikring for mjuke trafikantar i heile Nordhordland.

Regionrådet ønskjer og å peike på eit viktig vegprosjekt i Sogn og Fjordane. Regionrådet støtter arbeidet med å få realisert brusambandet over Brandangersundet. Dette vil knytte hovedøyane i Gulen til fastlandet og vere av stor betydning for havbruksnæringa og fiskeforedlingsbedriftene i området.

Regionrådet meiner prinsipielt at ferjetransporten innalands må sjåast på som ein del av vegnettet og vere gratis for brukarane. Etter rådet si oppfatning vil ferjesambanda i Nordhordland høve særs godt til prøvedrift med gratisferje.

Regionrådet vil elles peike på at ferjesambandet Leirvåg - Sløvåg snarast må få ei tenleg ferje som tilfredsstiller krava til trafikk- og miljøtryggleik.

Rådet vil og understreke at det må arbeidast for at den nye kabelferja mellom Masfjordnes og Duesund får fleire avgangar enn det som gjeld i dag.

Regionrådet meiner at grunnlaget for etablering av eit ferjetilbod mellom Nordhordland og Øygarden må utgreiast. Det må vere eit siktemål å få tiltaket innarbeidd i NTP 2006 - 2015.

Regionrådet er samd i at ein må satse på å få fleire av dei reisande til å nytte kollektive transportmidlar - særskilt gjeld dette reisande til/frå Bergen.

Rådet vil peike på at skysstasjonen i Knarvik må utviklast vidare som ein tenleg kollektivterminal med tilfredsstillande parkeringsareal i nærleiken.

Heile vegstrekninga mellom Bergen sentrum og Knarvik må vurderast med sikte på å få til ein raskare og meir komfortabel transport enn kva som er dagens situasjon. Naudsynte fysiske investeringar må gjennomførast for å få dette til.

Ein må og arbeide vidare med å utvikle eit kollektivtilbod internt i regionen som er tenleg for distrikta.

Regionrådet tilrår og at ein får vurdert grunnlaget for oppstart av eit snøggbåtsamband mellom Frekhaug og Bergen.

Regionrådet meiner at flytransporttilbodet på Flesland bør styrkjast - både med eit større tilbod på direkte utanlandsdestinasjonar og med breiare tilbod/priskonkurranse på innanlands flyruter.

Regionrådet stør opp under planane om at Bergen med omland får status som nasjonalhamn.

Rådet vil peike på at Mongstad er den nest største oljehamna i Europa. I tillegg er det i dette området stor trafikk inn til oljebasen på Mongstad Sør. På andre sida av Fensfjorden, i Sløvåg, vert det bygd ut eit større hamneanlegg med m.a. monalege bunkringsfasilitetar. Fensfjordområdet bør vurderast som ei samla eining i dei arbeida som no pågår når det gjeld hamneplanlegging. Her må vi ta intensjonane om samarbeid over fylkesgrensene på alvor og medverke til å skape grunnlag for ei spanande nasjonal satsing.