I sin høyringsuttale til fylkeskommunen har Regionrådet for Nordhordland og Gulen valt å vektleggje utviklinga innafor vegsektoren.

Regionrådet registrerer at dei tilrådde statlege løyvingane til riksvegutbygging i planperioden er dei lågaste som har vore på mange tiår.

Regionrådet ber om at fylkeskommunen arbeider for at dei statlege rammene vert auka monaleg.

Regionrådet ber og om støtte til at det generelt vert opna opp for at fleire vegprosjekt, enn dei som er tilrådde i planen, kan delfinansierast med hjelp av bompengar.

Fleire større og viktige tiltak på vegsektoren har vore gjennomførte i Nordhordland den siste tida og vegstandarden er mange stader nesten ikkje å kjenne igjen i høve til kva han var for berre få år tilbake.

Likevel gjenstår utbedring/nybygging av fleire ulike parsellar før vi får ein rimeleg tilfredstillande standard på vegane i regionen.

Regionrådet er glad for at ein i planframlegget til Nasjonal transportplan rår til ei utbetringa av Ev 39 gjennom Romarheimsdalen i perioden 2002 - 2005.

Når det elles gjeld Ev 39 så er det Regionrådet si meining at ein og snarast må gjennomføre tiltak for å betre trafikktilhøve gjennom tettstaden Knarvik. Knarvik er eit raskt veksande regionsenter som har ein monaleg gjennomgangstrafikk og i tillegg har ein stor lokaltrafikk.

Ringvegen i Nordhordland utgjer ein stor og viktig del av det sekundære riksvegnettet i regionen. Denne vegen har fleire stader særs dårleg standard. Dette gjeld særleg parsellen forbi Sletta på Radøy (Tolleshaug - Soltveit).

I tillegg har vegstrekningar i Austrheim kommune og parsellen Seim - Herland i Lindås kommune langt frå fullgod tofelt standard. Og på deler av riksvegen nord for Frekhaug i Meland kommune er det trong for utbetringar.

Det er viktig at desse vegane vert utbygde snarast slik at ein kan få styrkja grunnlaget for dei lokale sentra i regionen og såleis medverke til å halde oppe busettings- mønsteret og dempe sentraliseringstendensane.

Det må og setjast av midlar til trafikksikringstiltak i regionen, slik at ein får verna dei mjuke trafikantane og bygd ut tilstrekkeleg med veglys og busslommer.

Når det gjeld ferjetrafikken i regionen så er rådet kjend med at ein er i sluttfasen med omsyn til å få realisert bygginga av ei ny ferje til Fedje-sambandet.

Regionrådet vil vise til at ferjesambanda er ein del av riksvegnettet og meiner at på sikt bør desse sambanda verte gratis for trafikantane.