Resultat av kartlegginga:

Ungdomskartlegginga viste at om lag 50% av den samla ungdomsgruppa planlegg å ta høgare utdanning, meir enn 40% av ungdommane ynskjer å busetje seg i heimkommunen, og heile 70% av ungdommane kan tenkja seg å busetje seg i heimkommunen og ungdommane såg tilbodet i arbeidsmarknaden som den største hindringa for ei framtid i Nordhordland.

Kartlegginga av næringslivet, viste at det er innan offentleg sektor ein kan forventa den mest positive arbeidsmarknadsutviklinga, då særleg for arbeidskraft med høgare utdanning. Det private næringslivet vil fyrst og fremst ha faglært arbeidskraft.

Utdanningstilbodet i regionen er avgrensa, og kan med fordel byggjast opp på alle nivå.

Elles vil me visa til sluttrapporten Ungdom, utdanning og arbeid i Nordhordland og Gulen, som kan skaffast frå regionrådet (ein kan få den tilsendt elektronisk eller i papirutgåve).

Prosjekt: "Etablering av Utviklingssenter for prosesskunnskap"

Prosjekt "Etablering av Utviklingssenter for prosesskunnskap" er ei vidareføring av prosjektet "Kompetanseheving og utdanning innan fagområder tilpassa behovet for olje- og gassrelatert prosessindustri.".

I sist nemnde prosjekt vart det konkludert med at det i tillegg til innføring av nye studieplanar ved HiB og UiB og var trong for eit kompetansesenter som kunne tilby kurs og etter- og vidareutdanning innan prosessfaga.

Noverande prosjekt vil verte avslutta våren 2001 i samband med at det vert utarbeidd ein forretningsplan for eit slikt utviklingssenter.

To private verksemder har gjort vedtak om å skipa eit selskap som skal drive senteret. Selskapet vil få kontoradresse i Nordhordland. Det vert planlagt oppstart av kursverksemd hausten 2001.

Prosjekter knyta til utvikling i Mongstadområdet.

To prosjekt knyta til utviklinga på Mongstad starta opp i 2000. Det ein er ei forstudie som skal kartleggje grunnlaget for utvikling av ny næringsverksemd på Mongstad. Her er Hordaland Olje- og Gassenter prosjektansvarleg medan ABB Gas Technology AS har prosjektleiinga.

Lindås kommune står ansvarleg for eit prosjekt om klima og energitiltak i Mongstadområdet. Vestnorsk Plangruppe-Norconsult er engasjert som konsulent i prosjektet. Regionrådet deltek i den felles styringsgruppa for tiltaka og bidreg med faglege vurderingar.

Elles har prosjektleiar Tor Arne Lunde bistått privat verksemder i samband med utgreiingar om deira mogelege bruk av varmt vatn til oppdrettsverksemd på Mongstad.

 

Nye interkommunale ordningar.

Omtale av interkommunale ordningar som det har vore arbeidd med i 2000 og kor Regionrådet har vore trekt inn:

Legevaktordningar.

Radøy, Masfjorden og Lindås etablert frå årsskiftet 1999/2000 eit samarbeid om felles legevaktstasjon i helgene - som frå våren av vart utvida til kveld. Legevaktstasjonen er no utvida til og å dekkje natt, og denne nattfunksjonen har og Meland og Austrheim slutta seg til. Sambandsfunksjonen (legevaktsentral) er no lagt til legevaktstasjonen.

Heile ordninga vil verte evaluert innan 1. juni 2001.

Geodataplan.

Med utgangspunkt i prosjektet "Samarbeid om ei effektiv og einsarta forvaltning av Plan- og bygningslova" har det vore gjennomført eit arbeid med utvikling av ein felles geodataplan for regionen. Planen vil vere eit godt grunnlag for utarbeiding av geodataplanar i den einskilde kommune. Eit tilleggsprosjekt som er komme fram i samband med arbeidet med geodataprosjektet er det så kalla "Adresseprosjektet". Det vert no arbeid med å få finansiert eit større tiltak for å kunne etablere offisielle adresser for området frå Nordhordlandsbrua til Sognefjorden. Gjennomføringa av eit slikt felles adresseverk er kostnadsrekna til om lag 10. mill. kronar.

 

Konferansar.

Det har vore arrangert fleire konferansar og "utvida møte" i samband med dei ulike prosjekta som har vore gjennomført i Regionrådet sin regi.

I tillegg har Regionrådet og Hordaland Olje- og Gassenter stått som arrangør for ein konferanse på Alver Hotel 25. april om "Praktisk bruk av naturgass". På konferansen kom ein inn på korleis gassen kan nyttast som energikjelde i bustadhus, forretningsbygg og institusjonar - til industriell bruk og innan transport.

Messedeltaking.

Regionrådet har delteke på Bergen/Hordalandsstanden på offshoremessa ONS 2000 i Stavanger 22. - 25. august. Regionrådet sto for utforminga av den regionale standen og hadde finansiell støtte frå Statoil.

Vi opplevde at standen fekk ei fin utforming og at den samla Bergen/Hordalandstanden vart ein vellukka møteplass som gav grunnlag for mange kontaktar.

Når det gjaldt Nordhordlandsstanden så var vi særskilt tilfreds med at fem verksemder, i tillegg til Statoil og Regionrådet, valde å delta på messa - nemleg: Mongstad Elektro, Grieg Transport Mongstad, Mongstadbase, Vestec og Meland Golf.

 

Regionrådet har gjeve felles uttale i fleire saker i 2000. Her følgjer i samandrag nokre av desse uttalene:

- Regionrådet for Nordhordland og Gulen ba i møte 28. januar 2000 om at vegsjefane i høvesvis Hordaland og Sogn og Fjordane arbeider for at det snarast vert sett inn ei ny og betre ferje på sambandet Leirvåg - Sløvåg.

Det vart vist til at noverande ferje var lite tenleg.

- På neste møte, 17. mars, drøfta Regionrådet eit framlegg om organisering av likningsforvaltninga. Regionrådet uttalte m.a. at ein "ser det som viktig for innbyggarane i våre kommunar at dei og i framtida har eit tilbod som gjev tilgang på tenester innan likningsforvaltninga frå sjølvstendig styrte kontor i eigen kommune og at ein i arbeidet med ny organisering bør vektlegge samarbeid mellom kontor over kommunegrensene".

- Regionrådet har ved ulike høve i året som gjekk drøfta forhold knyta til interkommunalt samarbeid. Nokre av drøftingane har hatt sin bakgrunn i notat frå tidlegare ordførar Jostein Vike kor han gjer framlegg om eit prosjekt om ei brei drøfting av den framtidige utviklinga og samarbeidet i Nordhordlandsregionen

- På møte i mai slutta Regionrådet seg til uttalen frå formannskapet i Fedje kor det vert peika på at ein ser det som viktig at norsk kvalfangst kan få del i verdifull handel av kvalprodukt ved at eksportforbodet vert oppheva.

- I påfølgjande møte i juni gav rådet ein uttale til framlegg til fylkesplan for Hordaland 2000 - 2003.

I høyringsuttalen peiker rådet m.a. på at ein i samband med olje- og gasspolitikken ikkje bør innføre regionale geografiske avgrensingar av den nasjonale miljøpolitikken.

Når det gjeld punktet i planen om senterutvikling ber rådet om at Knarvik vert teke med i dette programområde under omgrepet regionsenter på lik line med Stord, Voss og Odda og elles at Nordhordland vert definert som ein region i fylkesplansamanheng..

Regionrådet hadde og merknader til programområde om "Utbyggingsmønsteret i Bergensregionen" og meir generelt til omtale og framlegg i planen om arealdisponeringa i fylket. Det er rådet si meining at ein i fylkesplanen ikkje må låse seg til avgrensa definisjonar som kan føre til stengsel for ein naturlege arealbruk.

Også dei såkalla vekstkommunane i Bergensområdet har sine utkantar og det vil vere urett om ein ikkje skal ha høve til å gjennomføre ei meir sprett utbygging i desse områda. Såleis er det naturleg at det er ulikskap i arealbruken i randområda i høve til i dei sentrumsnære områda.

Rådet hadde og merknader til programområde om "Hordaland som eitt transportfylke".

Som i Regionrådet sin høyringsuttale til Nasjonal transportplan har ein også i denne uttalen valt å vektleggje nokre av tilhøva innafor vegsektoren.

Regionrådet har registrert at dei tilrådde statlege løyvingane til riksvegutbygging i dei næraste åra er dei lågaste som har vore på mange tiår og ber om at fylkeskommunen arbeider for at rammene vert auka monaleg. Regionrådet ber og om støtte til at fleire vegprosjekt kan delfinansierast med hjelp av bompengar.

Når det gjeld programområdet Om sjøtransport og regionalt oljevern i fylkesplanen, peiker Regionrådet på det arbeidet som ved fleire høve har vore gjort her lokalt for å få bygd ut beredskapen i Nordhordland.

Rådet viser til at omlag halvparten av all godstonnasje til/frå landet vårt går over eit område avgrensa mellom Bergen og Solund. I tillegg har dette området ein stor trafikk som går nord-sør langs kysten. Etter Regionrådet si meining bør det byggjast opp ein større oljevernbase i Fedje-Fensfjordbassenget.

Om programområde "Kunnskapsfylket Hordaland" uttaler Regionrådet at ein ser det som positivt at ein i fylkesplanen fokuserer på koplinga mellom næringsutvikling og kunnskap/kompetanse.

Når det gjeld dei vidaregåande skulane særskilt vil Regionrådet peike på to tilhøve:

Det eine er at studieretningar som Naturbruk (blå variant), Musikk dans og drama og Idrettsfag må verte vurdert innført ved skular i regionen, og det andre at dei fysiske fasilitetane på skulane må verte utbygd slik at dei stettar dagens krav til skulemiljø og arbeidsmiljø.

- På same møte uttalte Regionrådet seg og om trafikkstasjonen i Knarvik. Her peika rådet på ein var kjent med at det er starta opp eit organisasjonsarbeid i Staten Vegvesen med siktemål mellom anna å effektivisere administrasjonen.

Rådet uttalte at ein i denne samanheng såg det som viktig for regionen at den lokale produksjonsavdelinga i Knarvik vart oppretthalde, med minst same volum som i dag, slik at ein får til eit godt vedlikehald og ei gunstig utbygging av mindre parsellar basert på kunnskap og erfaring frå lokale tilhøve.

Elles sa rådet at ein meiner at det bør vurderast om ikkje trafikkstasjonen i Knarvik kan byggjast ut til å ta eit større volum enn i dag, både med omsyn til trafikantar og køyretøy, og såleis avlaste aktiviteten på hovedstasjonen i Fyllingsdalen. Ei slik avlasting vil kunne verte ei god løysing også for mange brukarar frå området Bergen-nord.

- Om prinsipp for utdeling nye oppdrettskonsesjonar for laks og aure 2001 kom Regionrådet med følgjande merknader på sitt møte i november:

Gjennom konsesjonsordninga bør søknader/konsept som er lokalt forankra og som kan gje grunnlag for råstoffleveransar til lokal industri gjevast høg prioritet.

Det bør formast ein konsesjonspolitikk som gjev ein variert og konkurransedyktig struktur i næringa. Auksjonsprinsippet bør ikkje nyttast ved tildelingane.

 

Om Nordhordland Handverk- og Industrilag.

Styret i laget har hatt 9 møter i 2000 og handsama 57 saker. Laget har hatt 1 medlemsmøte i 2000. Det meste av arbeidet i laget foregår gjennom næringsutvalet, utdanningsutvalet og kommunikasjonsutvalet.

 

Utviklinga i distriktet.

Folkesetnaden.

Den samla tilvekst i folketalet i regionen i 2000 var om lag 0,5% mot 0,2% året før.

Meland var den kommunen i regionen som hadde størst folketilvekst også i 2000 med heile 2,6%. Elles vart det for 2000 registrert netto utflytting frå samtlege kommunar i regionen med unntak av Meland og Fedje.

                    Endringane i folkemengda i 2000 er vist i påfølgjande tabell.