e. 06.10.04

Årsmelding 2002.

Regionrådet for Nordhordland og Gulen vart skipa i oktober 1987.

Rådet har følgjande medlemskommunar: Austrheim, Fedje, Gulen, Lindås, Masfjorden, Meland og Radøy. Modalen og Osterøy er assosierte medlemer til rådet.

Regionrådet tok frå og med 1995 over funksjonane til Nordhordland Tiltakskontor. Noverande vedtekter for rådet vart samrøystes tilrådd i Regionrådet sitt møte 10.10.94 etter fleire høyringsrundar i kommunane.

Regionrådet består av ordførarane i medlemskommunane.

Rådsleiar: Ordførar Olav Steinar Namtvedt.

Nestleiar: Ordførar Odd Tøsdal.

Rådmennene har møterett i rådet og vert oppfordra til å ta del i møtene.

Næringsutvalet.

Under Regionrådet er det etablert eit næringsutval med særskilt ansvar for regionalt næringsretta arbeid.

Regionrådsleiaren (Olav Steinar Namtvedt) er i samsvar med statuttane formann i næringsutvalet. Andre medlemer valt av Regionrådet:  Odd Tøsdal   Vilgerd Storset Husa

Medlemer valt av Regionrådet etter tilråding frå organisasjonane:

frå arbeidstakarane: frå arbeidsgjevarane:

Ole Lysø Rune Fanebust

Torill A. Hjertås Arnt Brandtun

Administrasjon:

Kontoret har ei fast bemanning på 3 personar, dagleg leiar Eilif M. Berntsen, sekretær Bjørg Rydland og næringskonsulent Jostein Skråmestø.

Engasjement/prosjektstillingar:

Lillian Vabø Mongstad har vore engasjert som næringskonsulent fram til og med 30. april.

Kari Evensen Natland har hatt 4/5 stilling frå 1. mars med hovedoppgåve å vere sekretær for styret for Kompensasjonsfondet.

Jostein Skråmestø fekk oppgåva med å vere prosjektleiar for Breibandprosjektet også med verknad frå 1. mars. 4/5 av stillinga hans er øyremerka dette prosjektet.

Esther Varøy har frå 1. mai vore engasjert i halv stilling som næringskonsulent og i halv stilling som prosjektleiar for UNG-prosjektet.

Kjersti Haugland har vore prosjektleiar for prosjektet "Næringsretta kompetanseheving - NELL". Prosjektet vart avslutta i 2002. Hans Kvåle, Tor Arne Lunde deltok og i prosjektarbeidet.

Omorganisering av Regionrådet.

I samsvar med ny lov om interkommunale selskap må Regionrådet omdannast innan utgangen av 2003 - anten til eit IKS eller knytast opp til ein vertskommune og verte eit formelt § 27-organ etter kommunelova.

På møte 18. oktober 2002 gjorde Regionrådet slikt vedtak i sak 27/02:

"Regionrådet for Nordhordland og Gulen rår til at rådet vert organisert som eit

IKS, med namnet Nordhordland og Gulen IKS, og at utkastet til selskapsavtale vert sendt på høyring i kommunane med uttalefrist 20. desember 2002."

Det ligg no føre svar frå kommunane og arbeidet med omorganiseringa av rådet vil fortsetje i 2003.

Regionrådet si verksemd i 2002.

I tillegg til ordinært tiltaksarbeid, rettleiing, kontaktformidling og arbeid med saker for Regionrådet, har kontoret vore sekretariat for:

Nordhordland Handverk- og Industrilag, Mongstad Utviklingsselskap AS og ulike arbeidsutval og styringsgrupper.

Regionrådet har hatt 7 møte og 36 saker til handsaming i 2002.

Næringsutvalet har hatt 2 møte og løyvd kr. 295.000,- til ulike tiltak.

 

Næringsretta verksemd

Etablerarprogrammet 2002

Etablerarprogrammet har vore gjennomført i samsvar med opplegg for "Etablerarprogram 2002". Regionrådet for Nordhordland og Gulen har i 2002 arrangert eit etablerarkurs på 30 timar og to etablerarsamlingar med ulike tema. I programmet har ein vore i kontakt med i alt 86 etablerarar.

Jostein Skråmestø, Kari Evensen Natland og Esther Varøy har vore kursleiarar for etablerarkurset og hatt ansvaret for den faglege gjennomføringa av både kurs og samlingar. Det har vore trekt inn andre fagpersonar innan ulike felt etter behov.

Etablerarkurs 2002

17 deltakarar meldte seg på etablerarkurset som vart gjennomført i perioden 30.08.02 – 21.10.02. 15 deltakarar møtte på første samling, og alle 15 gjennomførte kurset.

Det var i alt 5 samlingar der kursleiarane la fram relevant teori/informasjon som deltakarne knytte til eigen etablering i grupper og i plenum. Deltakarane arbeida også med stoffet individuelt, også mellom samlingane. Målet, som og vart oppnådd, var at alle deltakarane skulle ha ein ferdig forretningsplan før kurset vart avslutta. Kva konklusjon dei kom til i høve til realisering av idéen og tidspunkt for evt. oppstart varierer.

Deltakarane kom frå kommunane; Lindås(8), Meland(3), Austrheim(2), Radøy(1) og Masfjorden(1). Gruppa var mangfaldig, med forretningsidear innan eit breitt spekter og aldersspenn frå 19 – 58 år. Det var 8 menn og 7 kvinner som fullførte kurset.

Evalueringa av kurset synte at deltakarane var særs godt nøgde med innhald og gjennomføringa av kurset.

 

Etablerarsamlingar 2002

Det har vorte arrangert to etablerarsamlingar i 2002. Desse samlingane skal vera ein felles møteplass for etablerarar og "hjelparnettverket" i regionen. Deltakarane på etablerarkursa vert gjort merksam på desse samlingane, og oppfordra til å bruka og utvikla desse samlingane vidare. 25.02.002 hadde me den fyrste etablerarsamlinga. Til denne samlinga valte me temaet "Etableraren og skatteetaten". Ein representant frå Lindås Likningskontor haldt innlegg.

27 personar møtte på samlinga, 22 etablerarar og 5 frå hjelparnettverk.

25.11.02 gjennomførte me den andre etablerarsamlinga. Etter ønskje frå deltakarane på årets etablerarkurs vart tema på denne samlinga "Personleg sal". Me leide inn ein foredragshaldar til å halde innlegg om tema. Samla møtte det 28 personar på samlinga, 22 etablerarar og 6 frå hjelparnettverk.

Evaluering av etablerarprogrammet

Etablerarprogrammet har no vore gjennomført årleg i fire år. Sjølv om ein har fylgd det same mønsteret i alle desse fire åra, så har det etter evalueringar vore gjort mindre justeringar undervegs. Kursdeltakarane får gjennom kurssamlingane ei grunnleggjande innføring i etablerarprosessen. Fleire av kursdeltakarane nyttar også høvet til å utvida/utvikla eige nettverk, og den interne fag- og erfaringsutvekslinga som skjer på kursa er vanskeleg å gjera ei generell vurdering av, men er utan tvil ein viktig effekt i det totale bilete.

Kursleiarane har inntrykk av at etablerarprogrammet fungerer etter intensjonen. Programmet er pårekneleg, og byrjar etterkvart å bli innarbeidd og kjent rundt i regionen.

I alt 60 deltakarar har til no fullført etablerarkursa. Ved 1-års rapporteringa etter etablerarkurset 2001 viser det seg at ca 40% har etablert verksemd. Nokre deltakarar hadde utsett oppstart, men ikkje skrinlagt planane.

Etablerarsamlingane har også blitt godt motteke. Så sjølv om det heilt sikkert er rom for forbetringar, så tyder alle tilbakemeldingar på at me er på rett veg.

 

 

Nettverkskreditt

Nettverkskreditt er ein finansieringsordning for etablerarar av småskala næringsverksemd og ein modell for å organisere samarbeid i nettverksgrupper. Kvar gruppe disponerer inntil kr. 200.000,- i utlånskapital. Tiltaket er forankra i SNP for Hordaland og i SND.

I Nordhordland er det etablert to grupper, høvesvis SUNNIVA og VILJA. Begge gruppene fungerer godt og har framleis dei same deltakarane som då gruppene starta opp. Samhaldet og aktiviteten i gruppene syner at sjølve nettverket er vel så viktig som finansieringsordninga.

Regionrådet har hatt prosjektansvar i samband med oppstart og oppfølging av gruppene samt eit informasjonsansvar over for nye interesserte i vårt område. Det har og i 2002 vore synt stor interesse for tiltaket, men utan at nye grupper er etablert.

 

Midlar som kompensasjon for auke i arbeidsgjevaravgifta for næringslivet.

For dei fire kommunane Austrheim, Lindås, Meland og Radøy som opplevde auka sats (frå sone II til sone I) for arbeidsgjevaravgifta, er det motteke statlege midlar som kompensasjon for dette.

Midlane er samla i eit regionalt fond. Til og med 31.12.02 var det motteke i alt kr. 72.088.831,- frå Kommunal- og regionaldepartementet.

Styret som forvaltar fondet er sett saman av ni representantar. I tillegg til dei 4 ordførarane er det 5 representantar frå næringslivet – to valt av Nordhordland Handverk- og Industrilag, ein frå handelsnæringa og to representantar frå LO.

Regionrådet sitt kontor har det administrative ansvaret for ordninga.

Midlane skal, etter retningsliner frå Stortinget, nyttast til kompetanseheving i næringslivet, til regionale utviklingstiltak og til infrastruktur – som ein del av arbeidet med å gjere det lettare for næringslivet og tilpasse seg den nye konkurransesituasjonen.

Pr. 31.12.02. er det gjeve tilsegn om ca. kr. 50. mill. frå fondet. Fordelinga er på 56% til kompetanseheving, 14% til regional utvikling og 30% på infrastruktur.

 

Strategisk næringsplan for Nordhordland og Gulen.

Regionrådet slutta seg til framlegget til ny strategisk næringsplan i 2001. Planen inneheld ein strategidel for perioden 2001 - 2004 og eit handlingsprogram for 2001 - 2002.

Det er såleis aktuelt å revidere handlingsprogrammet i 2003.

Ein del av tiltaka i den strategiske planen vil verte omtala under "prosjekt" i årsmeldinga. I tillegg har vi nokre merknader til følgjande punkt:

- Om mogeleg "Havbruksutval" i Nordhordland. Det var ikkje interesse i næringsutvalet/regionrådet for etablering av eit eige regionalt havbruksutval. Det vart derimot arrangert ein større havbrukskonferanse i regi av NHIL og Regionrådet i 2002 - sjå omtale under "konferansar".

- Når det gjeld framlegget om eit eige regionalt gassutval vart det rådd til at Regionrådet sitt næringsutval og skal fungere som "gassutval" for Nordhordland.

- Det er etablert eit regionalt kommunikasjonsutval med Olav Steinar Namtvedt, Odd Tøsdal og Helge Haukeland som medlemer. Utvalet har 2002 vurdert ulike samferdselstiltak, mellom anna hatt samtaler med Bergen kommune og Statens vegvesenet om finansieringa av Eikåstunnelen.

- Prosjektet "Vidareutvikling av det regionale utdanningstilbodet" har så langt ført til ei drøfting i ulike regionale fora av problemstillinga. Her har særleg utdanningsutvalet i NHIL vurdert ulike sider ved å få til eit etterutdanningstilbod overfor verksemdene i regionen. Gjennom NELL prosjektet, som vart formelt avslutta i 2002, er det og komme tilrådingar i høve til vidare arbeid med spørsmål knyta til organisering av kompetansehevingstiltak i regionen.

-Tiltaket "Modellar for attraktive bustadområde" har så lang ført til ein konferanse om bustadbygging i regionen - nye tiltak vil verte vurdert i prosjektet.

- Om tiltaket "Miljøtiltak-miljøfyrtårn". Bedriftene i regionen vart i 2002 invitert til eit seminar om miljøsertifisering. Oppslutninga om seminaret var diverre så liten at arrangementet måtte avlysast. Det er usikkert om tiltaket vert fylgd opp seinare.

- Til tiltaket "Infrastruktur på Mongstad" kan det knytast følgjande kommentarar;

- Infrastrukturselskap.

Regionrådet tok i 2001 initiativ til eit prosjekt for å få klarlagt det organisatoriske grunnlaget for eit infrastrukturselskap i Mongstadområdet. Aktuelle partar vart trekt inn i arbeidet og i 2002 etablerte Statoil, Mongstad Eiendomselskap, NHIL, Austrheim og Lindås kommunar selskapet; Mongstad Vekst AS. Selskapet skal ha som oppgåve leggje tilrette for industriutbyggingar og utnytting av energiressursar på Mongstad.

- Næringshage.

Austrheim Næringsselskap kjøpte i 2002 opp aksjene i Mongstad Utviklingsselskap AS til ein avtalt pris og har omdanna selskapet til Mongstad Utvikling AS. Mongstad Utvikling AS skal drive kontorutleige og bedriftsutvikling med utgangspunkt i Mongstadkrossen og arbeider aktivt med å få status som næringshage.

Om Samarbeidsprosjektet i Nordhordland og Gulen (SING)

Kommunane i Nordhordlandsregionen har gått saman i eit prosjekt med slik målsetting:

	Regionen skal få breiband til konkurransedyktige vilkår
	Kommunane skal ta i bruk breiband til effektivisering og kvalitetsutvikling av eigen organisasjon

Prosjekt: UNG - eit grenseoverskridande tiltak

Prosjektet er eit tiltak i den strategiske næringsplanen for regionen og samstundes forankra i SNP for Hordaland 2001-2003. Prosjektperioden er 1.5.2002 – 30.4.2004. Målet for prosjektet er å medverke til at fleire ungdomar vert buande eller flyttar tilbake til heimkommunen etter avslutta utdanning. Prosjektet har tre satsingsområde: 1)Ungdommen sitt engasjement, 2)Styrkje langsiktig næringsutvikling i regionen og 3) Betre samarbeid rundt ungdomssatsinga.

Under satsingsområde 1) har det vore eit mål å opprette ungdomsråd i alle dei deltakande kommunane. Dette vart prioritert i første halvår av prosjektet og alle kommunane vil ha ungdomsråd i gang i løpet av dei første månadene i 2003. Under satsingsområde 2) er det bruk av elevbedrift som undervisningsmetode samt samarbeid skule/næringsliv som står sentralt. Etter ei kort kartlegging viser det seg at ca 60 % av skulane i regionen ikkje nyttar elevbedrift som undervisningsmetode og at det er ca 25% av skulane som ikkje har noko kontakt med næringslivet.

Som ein del av prosjektet har dei deltakande kommunane forplikta seg til å utarbeide og gjennomføre ein kommunal plan for tiltak innanfor prosjektet. Desse planane er venta ferdig utarbeidd i februar 2003.

 

Tiltaket "Tryggare styring" - Nordhordland Handverk- og Industrilag

Nettverket har halde fram i år 2002 med tema som har hatt særleg fokus på leiarrolla.

Omlag 20 bedriftsleiarar møtast fire gonger i året og utviklar eit godt nettverk både fagleg og sosialt.

Prosjektet "Næringsretta kompetanseheving" NELL

Tiltaket er oppfølging av tidlegare NELL-prosjekt (nettverk for livslang læring).

Hovedmålet for prosjektet har vore å stimulere og leggje til rette for arbeid med kompetanseheving hjå bedriftene i regionen. Prosjektet har ut i frå erfaring og informasjon peika på mogelege tiltak som kan sikre kontinuitet med arbeidet med kompetanseheving for næringslivet.

Avslutningsvis i prosjektrapporten heiter det: "Opplæringskontoret for Nordhordland, saman med Nordhordland Handverk- og Industrilag og Regionrådet, dekkjer viktig oppgåver innan opplæring, utdanning, informasjon samt at ein yter service innanfor ulike område til verksemdene. Det er viktig at desse instansane deltek i det vidare arbeidet i regionen med sikte på å få ein meir permanent ordning for ein koordinerande funksjon i høve til arbeidet med kompetanseheving for næringslivet i regionen."

Prosjekta: Geodataplan - Felles tenesteyting.

Med utgangspunkt i prosjektet "Samarbeid om ei effektiv og einsarta forvaltning av Plan- og bygningslova" har det vore gjennomført eit arbeid med vidareutvikling av geodataplan for regionen. Samarbeidet i plangruppa har pågått også i heile 2002. Ein har hatt oppe ulike fagtema til drøfting, gjennomført seminar og kjøpt inn felles oppmålingsutstyr til bruk i kommunane. Eit "tilleggsprosjekt" som er komme fram i samband med arbeidet med geodataprosjektet er det så kalla "Adresseprosjektet". Det vert no arbeidd vidare med å få finansiert dette tiltak for å kunne etablere offisielle adresser i regionen.

Frå 1. januar 2003 er Geodataprosjektet integrert i prosjektet "Felles tenesteyting etter plan- og bygningslova".

Havbrukskonferanse

23. april 2002 arrangerte Handverk- og Industrilaget og Regionrådet ein havbrukskonferanse på Nordhordland Folkehøgskule. Konferansen dekka eit vidt fagleg område og hadde stor oppslutning - om lag 65 deltakarar.

Konferansen sette fokus på verdiskapinga i havbruksnæringa, ein fekk vurdert grunnlaget for fleire konsesjonar til regionen - og det vart meir spesifikt orientert om økonomi, marknad, nye artar, bruk av varmt vatn og leveransar av varer og tenester.

Bustadkonferanse

Regionrådet arrangert ein bustadkonferanse på Westland hotel 20. desember 2002 med i rundt 40 deltakar.

Eit siktemål med konferansen var å få klarlagt "korleis regionen og kommunane i fellesskap kan bidra til å skaffe bustader som tilfredsstiller etterspurnaden i befolkninga og som kan leggje grunnlag for vekst i folketalet i åra framover".

Kompetanseheving for næringslivet.

NELL-prosjektet arrangert ein konferanse 22. mai 2002 på Nordhordland Folkehøgskule kor det vart lagt fram ulike måtar å nærme seg problematikken omkring kompetanseheving i bedrifter og samspelet mellom bedrifter og lærestader. På konferansen var det m.a. innlegg frå representantar frå lokal industri og vidaregåande skuler, frå Universitet i Bergen og eit industrinettverk i Sunnhordland.

Messedeltaking.

Regionrådet har delteke på Bergen/Hordalandsstanden på offshoremessa ONS 2002 i Stavanger 27 - 30. august. Regionrådet sto for utforminga av den regionale delen av standen og hadde finansiell støtte frå kompensasjonsfondet.

I tillegg til Regionrådet, deltok tre verksemder på "Nordhordlandstanden" - nemleg: Mongstad Elektro, Grieg Transport Mongstad og Petronor.

Kulturtiltak

Museum.

Regionrådet har gjeve uttale til framlegg til fylkesdelplan for musea i Hordaland.

Regionrådet ønskjer at det vert bygd opp eit regionalt museum basert på ein ABM-modell og vil søkje staten om midlar til utvikle eit slik tiltak i Nordhordland. I uttalen frå Regionrådet heiter det m.a.;

Etter Regionrådet si vurdering vil eit samspel mellom dei ressursane som kan liggja i ein regional ABM-modell for Nordhordland, kombinert med den kompetanse på landskap og kulturmiljø som blir bygt opp ved Lyngheisenteret, gje eit svært godt utgangspunkt for å organisera eit regionalt tiltak i tråd med intensjonane i Stortingsmelding nr. 22 1999/2000 og dei nasjonale målsetjingane på dette feltet.

Kulturmidlar.

Regionrådet har i 2002 gjev mindre tilskott til fem ulike kulturtiltak av regional interesse.

"Skuleaksjonar".

Etter initiativ frå Regionrådet vart det løyvd midlar (frå Kompensasjonsfondet) til to utgreiingar med siktemål å hindre at Manger folkehøgskule vart nedlagt og for å kunne oppretthalde almenfagutdanninga ved Austrheim vidaregåande skule.

Fylkeskommunen gjorde seinare vedtak om ikkje å avvikle drifta på Manger - men ein vil venteleg komme tilbake på eit seinare tidspunkt med eit nytt opplegg for eigarskap/drift. Fylkestinget gjorde elles vedtak om at Austrheim vidaregåande skule framleis skal ha almenfag-tilbod.

Om Mattilsynet/næringsmiddelstilsynet.

Forvaltningsfunksjonen innafor det interkommunale næringsmiddeltilsynet vert overført til eit statleg mattilsyn, mens laboratoriefunksjon ikkje vert ført over.

Regionrådet ønskjer at det vert etablert ei lokal avdeling for Mattilsynet på Lindås. Regionrådet rår og til at laboratoriefunksjonen held fram og rådet har løyvd midlar til å få vurdert dette nærare.

Om Nordhordland Handverk- og Industrilag.

Styret i laget har hatt 9 møter i 2002 og handsama 63 saker. Laget har hatt

2 medlemsmøter i 2002. Det meste av arbeidet i laget foregår gjennom næringsutvalet, utdanningsutvalet og kommunikasjonsutvalet.

Næringskonsulenten hjå Regionrådet er engasjert som sekretær for laget.

 

 

 

Utviklinga i distriktet.

Folkesetnaden.

Den samla tilvekst i folketalet i regionen i 2002 var i overkant av 0,6% mot 0,5% dei to åra før.

Meland var den kommunen i regionen som hadde størst folketilvekst også i 2002 med heile 2,3%. Lindås hadde ein tilvekst på 0,7%. Fedje hadde den prosentvise største tilbakegangen i folketalet, men og Masfjorden og Gulen hadde nedgang i talet på innbyggjarar.

Endringane i folkemengda i 2002 er vist i påfølgjande tabell.

 

Folketal

i kommunane Fødsels- Netto Folke- 01.01.03. overskot flytting tilvekst i 2002

Austrheim 2519 1 3 4

Fedje 672 -7 -6 -13

 

Lindås 12701 58 31 89

Masfjorden 1737 -13 -13 -26

Meland 5710 40 93 133

Radøy 4646 10 18 28

---------------------------------------------------------------------------------------------------------

Nordhordland 27985 89 126 215 ----------------------------------------------------------------------------------------------------------

Gulen 2452 -20 -1 -21

----------------------------------------------------------------------------------------------------------

Regionen 30437 69 125 194

----------------------------------------------------------------------------------------------------------

Osterøy 7140 29 7 36

Modalen 346 -2 3 1

 

 

Arbeidsplan - næringsutvikling 2003:

Regional utviklingssplan.

Hovedmålet for tiltaket er å medverke til at regionen vert ein god stad å arbeide og bu i.

Viktige delmål vert å få til ei god utnytting av dei samla ressursane som regionen har til disposisjon for utvikling og drift og å markere regionen sine felles interesser overfor omverda. Prosjektet skal medverke til å få fram ein brei og open debatt om samfunnsutviklinga i regionen vår gjennom å invitere til ei drøfting av mål og utfordre med omsyn til val av strategiar og tiltak som kan medverke til ei gunstig utvikling innafor ulike sektorar. Prosjektet bør såleis og føre til at det vert skapt større regional interesse, samkjensle og identitet.

Arbeidet med Utviklingsplanen for Nordhordland og Gulen vil skje samstundes med at regionen driv anna plan- og utviklingsarbeid. Den prosessen som nå er sett i gang i samband med Utviklingsplanen skal ikkje ta over prosessar som andre organiserer. Resultat av andre plan- og utviklingsprosessar skal i staden verte løfta inn i Utviklingsplanen i ein dynamisk prosess.

Det er utarbeidd eit "Faktagrunnlag" som trekk opp 9 tema med stor verknad for utviklinga i Nordhordland og Gulen. Regionen har i gang plan- og utviklingsprosessar knytt til fleire av desse, m.a. tema som næring, bustad og ungdom.

I arbeidet med sjølve Utviklingsplanen vil det verte fokusert på følgjande tema i 2003:

	Folketal, arealbruk og samferdsel
	Kunnskap og kultur
	Organisering av offentleg tenesteproduksjon